گوم ونادي أخيَّك
خَل يِجي وياك
واُخُذ جيرانك
ومرُّو علينا
تَرة تراب العراق اليوم
ينخاك
واذا مرّه التعب
منهو اليعينه؟
موش انته الگلت من گبُلْ
عيناك؟
أمّن يا وطن
خَلها علينا؟
إذا جتّك محن
كل احنا نفداك
واذا مسّك ألم
اتوَچّه بينا
* * *
عونك يا وطن كل احنا جيناك
* * *
شفنا الدنيا كلها
تلاوت ياك
يا “رمح الله”
الفلا چلّت يمينه
كُلها تحالفت
ما لُوَت يمناك
وذراعك صعب
ياهو اليلينه!
جرحك ما نشف
من فاضت دماك
وأخو خيته اليِلم
جرحك بدينه
نزفت اسنين واگف
“جبل”
شفناك
يَصبرَك ما نوَصفَه
اشما حَچينا
عراق انتَ چبير
ونكبر وياك
ومن غيرك زغرنا
اشما علينا
گالوا ضيّعوك!
وگلنا
“نلگاك”
لأن مثل النَّخل
مزروع بينا
