|
|
||||
|
|
||||
 |
 |
 |
 |
|
|---|---|---|---|---|
 |
 |
|||
|
|
||||
|
|
||||
|
من شلش العراقي إلى اوباما الأمريكي ؟! |
||||
|
شبكة المنصور |
||||
| شلش العراقي | ||||
|
سيادة الرئيس ، بالعراقي ، الله يساعدك على التعب ، ومثل ما يگول جدي رحمة الله على روحه ، الله يگويك على ما ابتلاك به ، يگول ابو الدارمي العراقي
خـل روحـــك إبعِـز دوم بالك تذلها ولا تطلب الحاجــات إلاٌ من أهلهــا
جا اني ما كلت هذا حجي ابو الدارمي واني راح اطل منك حاجة لانك من أهلها ، هله بيك والف هله في بلادنه اليعربية ، احنه عرب ومضايفنا مفتوحة ومادام جيت بسلم نستقبلك بسلم، بس لازم تدري مثل ما كل الناس تدري واذا ما تدري تعال اگلك حته تدري ، ان أي بلوه في بلاد العرب من البحرين للمغرب ما يتعده سببها ثلاثة دول ، اسرائيل وأمريكا وإيران ، بالله اليهود ذولي حلفائك والحكيم يگول اذا اردت ان تطاع فامر بالمستطاع ، فلهذا ما راح اگلك عاقبهم او طيح حظهم وغيرها من العنتريات الي ما قتلت فج يوم ذبابة ، لان اولا انت ما تگدر عليهم ، وثانيا مبين اسلوبك لحد الان ما بيه ريحة حروب ولو اني ما متطمئن لشلة الحرامية الي حواليك ، اليهود مصخوها ، خليهم يجافونه شرهم ، تره تعبونه وتعبناهم والقدس تبقه عربية لو تطلع براس كل يهودي غابة نخيل ، اما ايران فبينك وبينها شمرت عصا وهي سبب دمار العراق فاذا بوش الله يطيح حظه وحظ الجلبي احتل العراق مره ، فايران احتلت العراق مليون مره وجابت للعراق شگو طايح حظ وطايحة حظ ومخبل وخبلة ومسودون ومسودنة ومنحرف ومنحرفة اخ منج صفية سهيل شكد منحرفة وفاسد وفاسدة وشاذ وشاذه وحرامي وحرامية وصگاك وصگاگه وعلاس وعلاسه وانتحاري وانتحارية ومتطرف ومتطرفة اخ منج سلامة الخفاجي شكد متطرفة وطائفي وطائفية اخ منج مريم الريس شكد طائفية وگواد وگوادة وسمسار وسمسارة وعاهر وعاهرة ، وفوكاها اهل العماميم يگولون بخطب الجمعة ايران مستعدة لمساعدتنا في بناء العراق الديمقراطي الجديد والمعلب والمسلفن ، والله نكتة ، تفوووووو على وجوهگك القذرة ، اوف اوباما شحجيلك
لاتسأل إعله الحال خلـيها سكته تسأل على المگتول والگاتل إنته
يعني اسرائل گلنه أنت تشتغل وياهم دبلوماسية ، ومصالحكم وحده وبيناتگم واوي اعرج ، جاااااااا شجاك على ايران، سكتت من يمها فرد سكته ، مو اني بده جريدي وزنه خمس كيلوات يلعب بعبي ، اخاف انتو دافنيها سوه ، ايباااااااااه ، اذا صدك ، ابو سمرة ، هاي سالفة ، بس اني بعدني متفائل يتصريحاتك ، بس والله تعبنه ، يعني راح اكلك اعجوبة من عجائب الدنية ، العراقيين تعبو ، تعرف شنو يعني عراقي ويتعب ، هاي عجيبه ، لان العراقي اقوى من الحديد
شحجي وتريد الناس من عندي أحجي دمعتي إبطرف العين بس أحجي أبجي
صحيح هو وگت اگشر وماله طعم يخلي عراقي عمق حضارته بعمق الزمان يطلب المساعده من واحد عمره شعبه جم سنه بس نگول هاي علامات قيام الساعه ولازم نؤمن بيها وما عندي غير اگول
لانفع نصحي أوياك لانفع لــــومي أنا ادري مامحضوض راح ابقى دومي
ولان العراقيين شعب اصيل وعمره ما يركع الا لله فصعبه علينه نطلب من جتالنه المساعده ، لكن خليني اخليها بلحيتي واطلبها منك عمي ابو سمره فدوه اروح لجهرتك السمره خلصنه من ايران واذا ما راح تستجيب لطلبي راح ادعي عليك واگول
ريت الله لا ينطيك يالعذبتني فوگ القهر والضيم لايران عفتني
احنه شعب نحب بعضنا ، وما نعرف هاي سوالف الطائفية لوما ايران وجماعتها ، وعيونك الوسيعة وشرفك يا ابن عمي حسين ، العراقيين واحد يموت على الاخر واذا تعرف تقره دارمي اقره
دجله وفرات الروح والكلب ذي قار واربيل عيني اتصير والجسد انبار عاش العراق انصيح عاشت فراتي واصرخ بعالي الصوت دجله حياتي سنه ويه شيعه اخوان صفينه الگلوب ليش الحزن بغداد ليش اسود الثوب كل فرق ماكو ارجوك وبتعد عني صح اني شيعي شبيك بس خالي سني
وتعال نسولف حجي مضايف ما دام انت طلعت من عدنه وبينه ، تره المالكي حمار جبير ، ويجذب عليك ، والطلباني واحد خفيف ما يمثل الاكراد العراقيين ، ومسعود خبيث خنيث والشهرستاني حرامي والسوداني طلع حرامي مثل ما حجيتلكم قبل اشهر ، والخزاعي اكبر قفاص ، وعزوز لا اطل الله في عمر واحد جلب تكله ايران موت يموت ، والمشهداني گلب بالدخل وعدنان الدليمي بريئه منه الانبار ، والقبنجي والقندرجي والباججي والجادرجي وكل جامعة جي عملاء عملاء عملاء ومقتدى طفل والسيستاني اكذوبة ، شايب مبرمج وفق الهوى الايراني ، وجيتك لحد الان ما بين الخير منها بس دوخونا بسياسة امريكا الجديدة وما شفنه شي
مو دمع تبجي العين عالخد نزل دم ردتك فرح للروح ليش اطلعت هم؟ يا ربي مو مليت واذتني لجروح لو ترحم الينخاك لو تاخذ الروح
ونصيحتي الاخيرة الك يا ابو سمره تحل موضوع العراق لان العراقيين صبرهم بده ينفذ وشلة الحرامية الي بالزريبة الخضراء وداعتك كله صيحة وتلكه طشارهم ماله والي وما تحس اله يجفتون عليك بالبيت الابيض وانوب تحير باكلهم وشربهم وهمه شلون بشر خايس عظامه وهمهم على بطونهم النوب تتورط وانت تعرف امريكا وضعها قلق وازمة ماليه هاده حيلكم ، وراح اكلك الشيعة والسنه والحرب الطائفية وهاي المسميات كله جذب وداعتك يريدون يقبضون فلوس بحجة الطائفية شوف ابو الدارمي شيكول وانتبه للبيت الاخير لان يهمك
صدگ امامي عمر صدگ امامي حسين قرأن واحد نزل منهو اليگول اثنين؟ خل نتحد خوان سنه ويه شيعه بس نتفق للموت عراق ما نبيعه هذا الوطن مبيوع وبدمنه يرجع بس نتحد والله امريكا تركع
شفت تره امريكا راح تركع وصعبه على الجبير يركع خليك مهيوب وخليك جبير ولا تخليني ازعل منك مع تحياتي وابياتي الي كتبتها على بوش الملعون ، طبعا انت تتفق ويايه انه ملعون بشرفك خليه بالقفص لان يستاهل كل شر
شيعة ونضل للدوم للسنه اخوان وبلخوة للأنبار تتباه ميسان بلخوة للأنبار تتباه كوفه بوش العراق بخير فك عينك وشوفه بوش العراق بخير بطل ملاعيب سنه التصوب عليك والشيعة تصيب سنه التصوب عليك والشيعي رماي نطرد زلم تكساس ونبجي زلماي نطرد زلم تكساس ونبجي لندن نلزم عدونه اليوم ونغطه بالتيزاب ونحركه بالتنور ونعلمه الارهاب انغطه بالتنور نجوية صدك جوية ونمده علتبليط نطوية الف طوية انمده علتبليط ونطكه جلاق ونطيح حظ المعتدي والخونه والسراق انعلمه هذا عراك كلمن يضدنه علمنه هاي الناس عل العرك احنه علمنه هاي الناس تكتب قوافي فكر وشعر واحساس روح وتصافي فكر وشعر واحساس عشك ومحنه صدر اليكتبه الليل والعجز النه وسلامتكم |
||||
|
شلش العراقي |
||||
| كيفية طباعة المقال | ||||
|
شبكة المنصور |
||||
|
||||
 |
 |
|||
 |
 |
 |
 |
|
