|
اجواء شتاء قارص يعني يكرص يخلي الواحد من البرد يركص ، مطر ورعد وبرق
، المواطن العراقي شلش المسترخي بملابسه الفضائية البراقة على كرسي
دوار براق وواسع ومريح ، ينفث دخان جكارة جروت براقة ايضا ومخلي رجل
على رجل ، ربورت آلي يدور حوله في محاولة لرضائه حاير شيسوي علمود يرضه
عنه شلش ، يضع امامه الكلنكس ، ينظف انف شلش المـزكوم بلطف وينصرف
لجلب الطعام والشراب ، اما شلش ينتصب تلفاز كبير جدا وغريب جدا حجمه
بكد شاشة سينما في غرفه رقميه كثيرة الانوار الملونة ، وبحركة من يديه
بلا رمونت كنترول تتغير القناة ، ومن قناة الى قناة تستقر اخيرا على
قناة العراق الرقمية التي تبث على اربعين قمر ومشتريا حقوق كل
المباريات العالمية حصرا بينما باقي شعوب العالم محرومة من متابعة
مباريات كرة القدم في منازلهم ، يعطي اشارة اوكي للتفزيون لمتابعة
نشرة الاخبار التي يقراها على العراقيين انسان الي لانهم بلد الثروات
فلا يحتاجون الى العمل ، فالحكومة العراقية تمنحهم قيمة حصتهم من
النفط شهريا مع تغير الربورت الآلي الذي يقوم بخدمة كل عراقي سنويا ،
تبدا نشرة الاخبار بعد ان يضع الربورت الآلي امام شلش صحن من الفواكه
وحمالة قناني مشروبات مختلفه ، شلش يطالب الانسان الالي بالانصراف
ليركز على الاخبار ، تبدا نشرة الاخبار
المذيع :ملاحظة للاستماع لنشرة الاخبار بللغة العربية استعمل الزر
واحد وللاستماع لها بلغة التحشيش استعمل الزر اثنين
شلش يحك انفه لان التقليعة الجديدة التفكير بحك الانف ويقول خلينا
نسمعها على الطريقتين ، يضغط واحد
المذيع : يا اهل العراق الكرام ، لكم مني الحب والتقدير والاحترام ،
فانتم من حققتم الاحلام ، بتطوير عمل الربورت بعد ان عجزت عن ذلك الصين
واليابان ،اتمنى ان تسمحوا لي بقراءة نشرة الاخبار واي مواطن لديه
اعتراض على شكل المذيع يمكن جلب مذيع خاصه له وحسب الطلب
شلش : شكد لوكي ويضغط على الرقم 2
المذيع : هلو شباب ، شلونكم مكاميع ،جبت الشتاء وجيت اني اليوم ،
طبعا كلها تعرف شنو هو المطر ، والتعريف العلمي للمطر : وهو ماء متساقط
من السماء ، والتعريف التحشسيشي للمطر : وهو مي ماندري وين جان ( يعني
دايح وين صاحبته ههههههه نتحول الى نشرة الاخبار
الخبر الاول : زواج الفنانة الشابة شاكيرا الرابعة عشر من لاعب نادي
برشلونه المدلل (يونس محمود الرابع عشر ) بعد قصة حب عنيفة استمرت 3
ايام بلياليها و أقيم الحفل في فندق برج البتاوين بلازا الذي يعتبر
من اغلى ابراج العالم و حضر حفل الزفاف رؤساء دول اوربا وامريكيا
والامين العام للأمم المتحدة جبار كيطان و مدير مهرجان كان
السينمائي عناد جوبيتان الفرنسي من اصل عراقي يذكر ان مهر الفنانة
شاكيرا هو بئر نفط في مستعمرتنا في كوكب المريخ
الخبر الثاني : أحالت وزير الاتصالات الى القضاء بسبب شكوى من مواطن
عراقي دك على رقم و لكاه مشغول ، وقد حاول رئيس الوزراء حل الموضوع
بالطرق السلمية بهداء المواطن المشتكي قمر صناعي من صنع العراق وعلى
نفقة رئيس الوزراء على سبيل الترضية
الخبر الثالث : يتشرف رئيس الجمهورية العراقية باعلان هذا الخبر العظيم
وبكل شفافيه فقد حازت سلسلة جبال شبيك بردان الاصطناعية في مدينة
المشخاب الرقمية على شرف احتضان بطولة العالم بالتزلج ويلتمس من
المواطنيني العراقين الحضور للبطولة من باب التواضع علما ان المركز
الاول والثاني والثالث هو من نصيب العراق بحسب مذكرة الدواء مقابل
الذهب الذي وقعته الحكومة العراقية مع دول اوربا المتخلفة التي عجزت عن
صنع لقاح ضج انفلونزا الواوي
الخبر الرابع : وزارة النقل و المواصلات الرقمية تلتمس من المواطنيني
العراقيين التبرع بجلكان بانزين للدول الاوربية الفقيرة بدلا رميها في
المجاري يذكر ان نصيب المواطن العراقي من البانزين يوميا يبلغ اكثر من
3000 لتر تيمننا بنهاية الالفية الثالثة يحصل عليها المواطن بكل يسر عن
طريق حنفيات و آبار خاصة تصل الى جميع ناطحات السحاب العراقية
الخبر الاخير : فاز فلم سنوات الموت العراقي للمخرج عبود اكشن بكل
الجوائز العالمية لهذه السنة ، الفلم يحكي قصة العراق للفترة بين 2003
و2030 واليكم جزء من الفلم ، هنا تظهر انفجارات واغتيالات ومسلحين
مباشرة يبدأ شلش بالصراخ على الانسان الالي ، تعال ولك ربورت ابن
الربورت جيبلي حبة السعادة ما اريد اذكر شنو صار لاجدادي ، يتناول
الحبة ويقول للربورت روح جيبلي صديقتي رقم 310 وخليها تصبغ شعرها اشقر
، يصفن ويكول اوف منكم يا عراقيين مو كلكم جدي شلش الاول من جان عضو
مجلس نواب اصبروا كلها 990 سنة والامور تتعدل بس انتم جنتوا مصرين
وبقيتوا تقتلون ببعض الى سنة 2030 ، شحصلتوا من صار عددك 13 رجل وخمس
نسوان 3 اطفال ، افو منكم ما تصيرلكم جاره ،بعدها يقوم شلش باصطحاب
صاحبته الروسية في احد المولات الطاكه ، و ربورت آلي يمشي امامه يحمل
مكنسه لينظف له الارض ، شلش يمتعض ويصرخ ولك ربورت تعال تعال ابن
الربورت تعال حك خشمي ، يبدا ربورت آلي بحك خشمه لا مو هنا لا ... لا
هنا أي عاشت اسلاكك ودوائرك الالكترونية ، شوف اني عاجبني اليوم اتعشه
بمطاعم مجموعة باب الشرجي هوتلز انترناشيونال ، وفعلا ينتقل الى هناك ،
اربعة ربورت آلي يقومون بخدمته ، طاوله من ما لذا وطاب يلتهمها بينما
الفتاة الشقارء تضع قبله على خده بين لقمة والاخرى
شلش : يضع لقمة كبيرة في فمه ويقول للشقراء من وره خشمه تفضلي
الشقراء : بانفعال شلون تقبلها سيدي وتاج راسي اني اكل وي عراقي حرام
احنه ننسه فضلكم علينا من خرجتونا من الازمة المالية العاشرة سنة 2500
، ننسه ان رئيسكم الله يحفظه هو من قام بالحد من انتشار الاسلحه
النووية ، شننسه حتى ننسه ننسه انكم خليتوا البروفسورة كاشية ام اللبن
تخيط ثقب الاوزون وتنقذون البشرية ، شلون اكل وياك اني هدفي بالحياة
سعادتك وبس
شلش : بكيفك طبك مرض يكمل اكل بدون اكتراث وبدون كلام
وصل وقت الدفع ، ربورت آلي يتقدم بأدب نحو شلش ينحني ويقدم ورقة
الكترونية
شلش : يصير عصبي ويصيح كلكم قفاصه حرامية شنو حسابي دينار واحد يجر
الموبايل الغريب العجيب و يطلب وزير السياحة
شلش : اكلك وزير شنو اني اكل بمطاعم مجموعة باب الشرجي هوتلز
انترناشيونال يكولوي حسابك دينار
الوزير : العفو اكيد اكو خطئ مو ممكن ابدا
شلش : ليش اني شنو ماكل هو خمس ددجاجات وكيلوين كباب وسمجه بنيه مسكوفه
ودرزن ببسي
الوزير : معقوله دينار ، دينارنا سيدي المواطن اعلى عملة بالعالم اكيد
اكو خلل
شلش : لا انتم الانسان الالي مالتكم قفاصه لو تريد يصير مصيرك مثل وزير
الاتصال الي جاي يتوسل بالموطن العراق علمود يتنازل عن القضية مال
اتصال المواطن برقم خارج نطاق الخدمة
الوزير : لا عيني فدوه اروحلك ، المجموعة كلها الغيها وابني غيرها في
ظرف شهر بس لا تزعل ، انتظرني اني هسه جايك ،
شلش : شنو انتظرك ، تريديني افوت لقاء برشلونه وريال مدريد واليوم
يونس محمود يلعب علمود تحلي موضوع تافه
الوزير : زين يا عيني شنو تريد مني اني بخدمتك سيدي
شلش :اني ادفع مية فلس وبس
الوزير : اصلا هوايه انت اكيد واحد تلاف لان الباقي بقشيش واحنه لغينا
هاي الخدمه من زمان لا بقشيش ولا اكراميات ولا رشاوي ولا فيديني وافيدك
عيني استاذ شنشول خمسين فلس كافيه
شلش : بس شكرا
يخرج وعلامات الانتصار على محياه حلوه محياة شكد فياك ابو الشوش يترك
خمسين فلس على الطاولة ويجي ربورت آلي بسياره طولها بطول المنطقة
الخضراء سنة 2015 الي صار طولها اكبر من نص العراق ويقله الى حيث
البيت
يرجع شلش للبيت رفقة حبيبته الشقراء ، يدخل البيت يلتف الها ، يصيح
شلش : هاي شنوووووووو انتي بعدج شقراء ، يعني قبل العشه شقراء وبعد
العشه شقراء ، شنو هل التخلف
الفتاة : اسفه حبيبي شنو تريد حاضره اني
شلش : لا خرب واهسي اطلعي بره
الفتاة : لا عفيه والله تصير ازمة دبلماسية بين بلدي وبلدك
شلش : طبكم مرض علمود تعرفون منو هو العراقي
الفتاة : عيني والله رئيس وزراءنا يخليني بالسجن عيوني
شلش : اطلعي بره
ويكـز بسنونه وفجاءة يجي ابو النفط ويتحول القطاع الى مهرجان فرح يقوم
نصف نائم مرددا هجم بيت البانية شكد تنفخ
|
