جزء من خراب مجتمعاتنا .. المجاملات .. خالك وعمك واختك وخالتك .. .واحدة من اسباب تقدم الشعوب .. لايعملون بالمجاملات والمعارف خلال عملية بناء المجتمع والعمل السياسي والدولة .. كثيرا ماشاهدنا خلال فترة حياتنا في المجالات هكذا امور ومنها سوالف ابن المسؤول او ابن اخت المسؤول او ابن اخ المسؤول وطبعا لازم محد يحاجيه مسؤول .. وحتى لااطلق العمومية سبب خرابنا هو هذا الجزء المهم.لان المشكلة دائما استحقاقاتهم ليست في محلها.   تراه متخلف ويصير مهندس مثلا او مدرسة ممكمل ويصير ضابط او ابو وزير لازم هو الكل بالكل لو اذا ابو صار رئيس وزراء لازم حمودي يشلخ ويملخ بكيفة ..   وطبعا هنالك مشكله يعيشها هؤلاء الابناء في اغلب الظروف يعيشون عقدة انا ابن المسؤول ولازم تبقى الناس تلعب نفسها منه وفي كل زمان ولكل حكم هنالك هكذا شئ الى متى نبقى بهذه العقلية المتخلفة .. والنوب سالفة الاسلحة صارت مودة مو اسلحة العلم والثقافة وانما اسلحة التخلف والجهل والفساد وعدم التربية ومعها المسدسات الي يتباهون بيها ..   هذه المشكله ان يصحح المجتمع العراقي والعربي واخص المجتمع العراقي لانها صارت مودة عدنا .. اقتل بكيفك وصفي بكيفك وذب بالسجن بكيفك .. لان ابن المسؤول ضاج وتنرفز وراح على ماما. يشتكي  لان بالتاكيد هنالك مسؤولين اصلاء لايريدون هذا الشئ يحصل حتى لايسئ لسمعتهم .. نرجع لماما .. الي طبعا اكيد هم متخلفة واغلبهن .. تروح على بابا .. وبعدين بابا يشغل كلابه ينهشون بالعالم لانه ابنه مجرد تنرفز .. لعد لو واحد ضاربة راشدي لانه غير مؤدب .. وبالمناسبة كثير من المسؤولين ترى ابنائهم غير مؤدبين .. لان المسؤول الي ميعرف يربي ابنه التربية الصحيحة لايستحق ان يكون مسؤول ويقود تربية المجتمع وشواهد كثيرة تحدث امامنا .. ماعندهم غير على كولت المسرحية .. اني ابن عم الخياط الي خيط بدلة العروس .. الكثير الكثير في جعبتي ..   رسالتي لكل عراقي شريف ومخلص لوالديه ولوطنه اولا ان يتحلى بالتربية الصحيحة ليكون قدوة لوالديه لايقول انا ابوية مسعول .. عفوا مسؤول .. لان السئ يصح عليه المسعول .. لنكون اكثر قساة في تربية اولادنا لانهم بالتالي جزء من المجتمع .. يجب ان يلبس العسكرية حاله حال ابن الخايبة .. ولتسوله واسطه .. وخليه يدرس حتى ياخذ شهادة واذا فشل لاتحاول تغطية فشله ان تجعله بمكان يجعله يسئ للناس بسبب عقدة فشله .. او تجعله مثلا ضابطا بالجيش وبالتاكيد سيفشل في قيادة المعركة .. لان قوانين الحرب تتطلب عقل متنور باصول المعركة والحرب .. لاقوانين اني ابن المسعول ..   اتذكر عندما كنت موظف  في احدى دوائر وزارة النفط النفط .. كنت خفر بالدائرة .. الساعة 12 مساءا جائني حارس الباب وقال لي ابن المسؤول الفلاني بالباب .. اسرعت لاعرف ماالموضوع .. وأراه هو شقيق احد المسؤولين .. واكن له كل الاحترام والتقدير رحمه الله . قلت له تفضل قال سيارتي عاطله واريد احد يصلحلياها .. طبعا هو ليش اجه لدائرتنا .. لان دائرتنا متخصصة بتصليح السيارات والعجلات الحكومية فقط وبجانب دارهم او دار المسؤول .. والافندي تجاوز على الحق العام ويريد بكيفه .. بالتاكيد قلت له لكن هذه دائرة لايمكن ان تصلح السيارات الشخصية .. طبعا .. مع الاسف كام يعنفص .. لانه ابن مسؤول وعمرة ميتجاوز 17 سنه شلون اخذ اجازة السوق هم مااحجي بيها .. المهم قلت له لاتصل بأحد .. اتصلت بمدير المعمل .. قال لي بالحرف الواحد يمعود صلحلهيا .. وخلصنا .. طبعا اشتغلت جفيان شر .. وفي لحظة كرهت الساعة الي ولدت بيها لان اني خفر لحماية الدوله الصحيحة المتقدمة كانت بسرعة البرق وابن المسعول .. الافندي يريد يطلع بالليل يتخم .. وسيارته كان بيها عطل بسيط وفوكاها ماعندة اجازة سياقة واكيد فاشل دراسيا لانه تحت طائله ابن مسؤول يجوز حصل شهادة اذا عندة شهادة .. مااعرف ..   واليوم كذلك .. حدث ولا حرج .. ابناء فراش المسؤول ميتحجون او ابن السيد لو ابن الشيخ .. وابن المسؤول الفاشل .. ولازم ابنائهم كلهم يصيرون مسؤولين مثلهم .. جا بوية ليش  .. ادري المجتمع العراقي لعبة طوبة بيد ابناء المسؤولين الفاشلين .. مع جل احترامي وتقديري لكل مسؤول اعطى التربية الصحيحة لابناءه لياخذوا حقهم وفق القوانين التي تطبق على كل فرد .. ولكل مسؤول ضحى لاجل المجتمع والوطن .. وجل احترامي لابن المسؤول المحترم والذكي والمؤدب وبالاخص الذي على الاقل يحترم والديه ولايكسر لهم كلام او تربية .. لانه بالتالي اذا اساء ستنعكس على ذلك الوالد الطيب او العائله المحترمة .. وعلى الاقل نقول رضى الله من رضى الوالدين نحن في هذا الحوار لانبخس حق ابناء المسؤولين عندما يتساوون مع ابناء المجتمع بالحقوق والواجبات .وان يستفاد منهم المجتمع عندما ياخذوا استحقاقهم بجدارة .. لا بجدارة ابوية وجدي وخالي وعمي وعمتي.    .. وهذه الايه تنطبق على المجتمع ايضا لان المسؤولين والمسؤولات هم بمثابة اولياء امور المجتمع ويجب ان يعطون رسالة وتربية صحيحة للمجتمع .. حتى لايتحول المسؤول وابناءه وعائلته الى اضحوكة .. امثال حكومات حمودي .. .محبتي  .. مع جل احترامي